Li ser nîqaşên dawî li ser pirsa Mûsil û Kerkûkê, Platforma Kurdên Ewrûpayê - PLATFORM û HEVKARÎ - Platforma Rêxistinên Kurdistan lElmanya beyanek derxistin. Em van beyanan bi giştî li jêrê diweşînin. DENG

Dilê me li başûrê Kurdistanê lê dixe!

Doza gelê me ya rewa îroj ketiye qonaxeke pirî dijwar. Di vê demê de ji alîyekî ve gefên ku bi armanca tarîkirina pêşeroja me û nehiştina destkevtîyên me yên dîrokî li me kurdan tên xwarin û ji alîyê din ve jî îmkanên ji bo çareserkirina pirsa me ya kevnare derketine ortê, bi hevdu re xuya dibin. Di tu demên dîrokê de, ne xetereke weha mezin peyda bûye û ne jî firsendeke weha baş ketiye destên kurdan.

Tevî hemû kêmanîyên xwe jî gavên li başûrê welatê me tên avêtin û avakirina her ku diçe di jîyana me kurdan de bêtir bi cîh dibe, pêşeroja gelekî mezlûm misogertir dikin û ji bo paraztin û pêşdebirina dozeke rewa îmkanên bêhempa pêşkêş dikin. Lê dewleta Tirkîyeyê ya ku raya dinyayê ya giştî li hin guhartinên wê yên vê dawîyê -bêyî ku navê gelê me û hebûna wî telafûz bike- yên bi zora Ewrûpayê ve li ser kaxezê çêbûne bi şik mêze dike, bi xeta xwe ya li Rohilata Navîn dîyar dike ku ew ê li dijî her mafekî kurdan raweste û li kîjan devera dinyayê dibe bila bibe, dê nehêle ku kurd bigîhêjin tu mafan. Rejîma ku li ser bingehê înkarkirina ziman, çand û hebûna me kurdan hatiye avakirin, îroj di vê dema me ya nazik de, tehdîda herî mezin pêk tîne. Ew qîma xwe bi tehdîdan bi tenê naîne, herweha hevalbendên xwe dixwaze bi dewletên herêmê yên din re jî vê tehdîdê dijwartir bike.

Rejîma dagîrker ji 1991ê vir de bi her awayî xwestiye ku destkevtîyên başûrê Kurdistanê yên sîyasî ji holê rake. Ji bo vê armanca xwe her metod bi kar anîye. Helwêsta Tirkîyeyê ya êrîşkar di van demên dawîyê de başûrê welatê me bêtir tehdîd dike. Lê dewleta başûrê welatê me ya federal jî bi helwêsteke zelaltir û mêrxastir li dijî êrîş û planên Tirkîyeyê yên qirêj radiweste. Ev helwêsta birêvebirên dewleta me ya federal bawerîya me xurttir dike û di nav kurdan de dibe sedema xweşbînîyeke mezin.

Ev helwêsta ku li ser bingehê paraztina hêjayî û deskevtîyên neteweyî bilind dibe, divê ji me hemûyan re bibe rehber. Nemaze axavtina birêz Mesûd Berzanî ya li Parlamentoya Kurdistanê û bersivên wî yên li hember êrîşên Tirkîyeyê yên vê dawîyê û herweha daxuyanîyên wî yên li ser çareserkirina pirsa kurd û êrîşa Emerîkayê ya muhtemel hêvîyên me kurdên bakur xurttir dike.

Hemû partîyên Tirkîyeyê yên sîyasî tevî ku nakokîyên xwe yên hindurîn jî hêzên xwe kirine yek û di şexsîyeta PDK-Iraqê de êrîşî kurdên Basûr û dewleta wan dike. Tirkîye Kerkûk û Mûsilê mîna bajarên tirkmenan nîşan dide û di vî warî de gefan li Dewleta Federal dixwe. Em, Platforma Kurdên Ewrûpayê dê bi her awayî li dijî van planên Tirkîyeyê derkevin, tehdîdên wê yên li ser başûrê Kurdistanê bi tundî rûreş bikin û zilm û çavsorîya wê mehkûm bikin.

Gelê Kurdistanê her roj bi hêjayîya destkevtîyên xwe yên neteweyî bêtir dizane û ew ê tu caran destûrê nede ku zerareke herî piçûk jî bigîhêje wan.

Em bangî raya gelê Kurdistanê ya giştî dikin ku li dijî êrîşên Tirkîyeya dagîrker bi tundî rawestin.

26-8-2002
Platforma Kurdên Ewrûpayê - PLATFORM

Divê em destkevtîyên xwe biparêzin

Di vê demên dawî da dewleta dagirkera Tirk bona ji holê rakirina deskeftîyên me li Kurdistana Başûr, ku berhema xwîna sedanhezar şehîd e, gefa Kurdistana Başur dixwe.

Piştî serhildana gelê me li Kurdistana Başûr, rêvabirina heremê bi alîkarîya hêzên navnetewî kete destê rêxistinên wî beşê welatê me. Rêxistinên Kurd yên Kurdistana Başur ji bona cihgir bûna desthilatdarîya netewi gavan davêjin; sazî û mueseseyên netewî li başûrê welatê me herku diçe di jîyana Kurdên başûr da bêtir bi cîh dibe, avakirin û nûvesazkirina welêt xewa dagirkerên welatê me direvîne.

Yek ji wan dagirkeran dewleta Tirkîyê yê. Dewleta Tirk a nijadperest gelek caran nîşan daye, ku li dijî her mafekî Kurdan e, li kîjan devera dinyayê dibe bila bibe, xebat dike ku Kurd nagîhêjin tu mafên xwe. Rejîma ku li ser bingehê înkarkirina ziman, çand û hebûna me Kurdan hatiye avakirin, di vê dema me ya nazik da, tehdîda herî mezin pêk tîne. Ew qîma xwe tenê bi tehdîdan nayîne, herweha bona ruxandina desthilatdarîya Kurd li başurê welatê me, dixwaze ligel degirkerên din ve hevalbend be, bi van ra bikeve hevkariyê.

Rejîma dagîrker ji 1991'ê vir de bi her awayî xwestiye ku destkevtîyên başûrê Kurdistanê yên sîyasî ji holê rake. Ji bo vê armanca xwe her metod bi kar anîye. Helwêsta Tirkîyeyê ya êrîşkar di van demên dawîyê da başûrê welatê me bêtir tehdîd dike. Lê desthilatdarên başûrê welatê me jî bi helwêsteke zelaltir û mêrxastir li dijî êrîş û planên Tirkîyê yên qirêj radiwestin.

Hemû partîyên Tirkîyê yên sîyasî tevî ku nakokîyên xwe yên hindurîn jî, hêzên xwe kirine yek û di şexsîyeta PDK-Iraqê de êrîşî Kurdên Başûr û destkevtîyên wî dikin. Tirkîyê Kerkûk û Mûsilê mîna bajarên Tirkmenan nîşan dide û di vî warî de gefan li Dewleta Federal dixwe. Divê hemû partî, rêxistin û sazîyên Kurd beramber gefa dewletê degirker bêdeng nemînin, dengê xwe dijî karbidestên Tirk yên şovînîst bilind bikin.

Em 18 partiyên Kurd ji her çar parçeyên Kurdistanê, bi her awayî li dijî van planên Tirkîyeyê derkevin, tehdîdên wê yên li ser başûrê Kurdistanê bi tundî rûreş dikin û zilm û çavsorîya wê mehkûm dikin.

Em bangî raya gelê Kurdistanê ya giştî dikin ku li dijî êrîşên Tirkîyê ya dagirker bi tundî rawestin.

Em bangi raya gişti ya navnetewi, Yekitiya Milletan û Endamên Hêza Çakuç dikin, ku dijî êriş û gef xwarina dewleta Tirk derkevin, Kurdistana başûre tenê nehîlin.

27.08.2002
HEVKARÎ - Platforma Rêxistinên Kurdistan -Elmanya