Her wekî tê zanin, di vê guncîkê da gelek maqale li ser yêkitî û hevkariyê hatine belav kirinê.

Babeta vê nivîsa min jî dîsa yekîtî ye.

Gotina bav û kalên me heye, ku dibêje “hirç 9 kilam dibêje, hemu jî li ser berû ne.”

Kilamên hêzên welatparêz jî li ser yekitî û hevxebatî ne.

Derbilmeselek heye.

Melayek û Bektaşiyek destên xwe dirêjê esman kirine û li ber Xwedê digerin.

Mela dibêje, “Xwedê, îman bide min, îmanê min zêde ke!.”

Bektaşî jî dibêje, “Xwedê, ji min ra hinek dirav bişeyne, şerav bikirim.”

Mela, ku gotina Bektaşî dibîhise, lê vedigere û usa dibêje:

“Mal ava, çima ji Xwedê ji bona şeravê dirav dixwazi?”

Bektaşî lê vedigere û “Xwedê jê razî, tu hewcedarî îmanê, îman dixwazi, ez hewcedarî şeravê me, şerav dixwazim.”

Ji ber ku gelê me li Kurdistana Bakur hewcedar e, hêzên welatparêz û demokratîk jî, her tim yekitî dixwazin.

Di wan rojên dawiyê de jî gelek behsa yekitiyê tê kirinê.

Li ser yekitî û yekhelwesta Kurdan, civîn û konferans hatine çêkirin û wê bêne çêkirinê.

Bê guman civîn û konferansên hanê baş in.

Û rê li ber yekitiya hêzên welatparêzên Kurd vedikin.

Ji bona ku civin û konferansên hanê bigihine armancên xwe, berhema xwe bidin, divê hinek xal li ber çavên me bin.

Yek ji wan rastbînî ye.

Ango, yekitî û hevxebata hêzên Kurd, li ser rastiyên welatê me were ava kirinê.

Divê li ser bingeha mafê çarenûsê, bernameyeka rêk û pêk û kurt were amade kirinê û têda daxwazên gelê me yên sereke û lezgîn cî bigrin.

Divê hêz û aliyên welatparêz, li ser daxwazên xwe yên taybetî pêgir nebin, xalên hevbeş derxine pêş.

Divê deriyê yekîtî û hevkariyê, ji bona hemu hêz û aliyên welatparêz vekirî be, tû hêz li derva nemîne.

Û ji hemu giringtir, divê yêkitî û hevkarî li ser kaxizê nemine, dakeve meydana tekoşînê, kar û xebat bike.

Herwekî dersên hevkariya hêzên Kurdistana Bakur jî nişan didin, pêkanîn û berdewamiya hevkarî û yekitî hêsan nîne.

Bê guman gelek asteng, pirs û pirsgirêk hene li ser rêya yekitiya hêzên welatparêz.

Bona vê yekê jî divê hêzên welatparêz gav bi gav, qonax bi qonax biçine pêş.

Lê, berê her tiştê divê di nava hêzên welatparêz da, diyalog û dan û standin hebe.

Dan û standina hêzên welatparêz, kar û xebat ji bona daxwazeka diyar û eşkere, pêkanina yekitiyê hêsantir dikin.

Divê ji bîra me neçe, ku mercê serekî ya rizgariya Kurdistanê, yekitiya hêzên welatparêzên Kurd e, di hemu warên jiyan û xebatê da.