Bi gor nuçeyek, ku di rojnama Hurriyeta Tirkî da hatiye belav kirinê, Kovara Newsweekê Amerîkî, derewên herê mezin ya rêveberiya Bush, ku di sala 2006’an da kirine, berhev kiriye.

Bi gor kovara Newsweek, mezintirin derewa Bush ev e, ku gotiye “em li İraqê, di şerê da serdikevin”...

Hûn çi dibêjin?

Gelo, eger em bixwazin derewên karbidestên Tirkiyê û hikumeta Erdoxanê yên sala 2006’ê berhev kin, çend rûpel kaxiz têra me bike?

Belê, ez baş dizanim, karbidestên dewleta Tirkiyê her roj hênde derewan dikin, ku bi rastî zexmet e meriv bikare hêjmara derewên wan tesbît bike.

Her usa gelek dijwar e, ku meriv derewekî destnişan bike û bêje “derewa hanê, mezintirin derewa hikumeta Erdoxan e.”

Bi gor min, nûtirin derewa Serokwezirê Tirkiyê, şayanê hênde ye, ku meriv dikare bêje “derewa herî mezin ya sala 2006’an e.”

Herwekî tê zanin, çend roj berê Erdoxan li dewleta Yekbûyî ya Emerîka gotibû, ku “li Tirkiyê, tiştek bi navê ‘mafên Kurdan’ nîne. Li Tirkiyê, mafên Kurd û Tirk wekyek e” û hwd...

Kurd, gava derewên usa mezin dibihizin, dibêjin “hey li vê derewê”..

Hay malneketo Erdoxan!..

Derew dibe, lê usa mezin û bê endaze?

Li hinek navçeyên Kurdistanê, di şevên dirêjên zivistanê da, gundî li hev kom dibin û leca gotina derewên mezin digrin.

Ez pişt rast im, eger Erdoxan beşdarê lecên hanê bibe, wê hertim serkeve û bibe şampiyon!..

Dibêjin, “siyaset hunerê mimkun e.”

Gotina hanê kurtirin û bi naveroktirin wateya siyasetê e.

Lê belê, li Tirkiyê ne usa ye.

Li Tirkiyê, di nava gel da dibêjin siyaset, ango derew.”

Di zirufa hêyî ya Tirkiyê da, gotina hanê rast e.

Ji ber ku siyasetmedar, karbidest û rêvabirên dewleta Tirkiyê heya niha derew kirine; îro jî dikin...

Gelê Tirkiyê jî carna seba xatirê dîn û îman, carna seba xatirê abur, welat û netew, baweriya xwe pê derewên karbidestên dewleta Tirk aniye.

Û ev yeka bi sedan sal berdewam e.

Karbidestên dewletê, (çi piçûk çi mezin) bi hezaran derewan dikin.

Gelê zahmetkeş û bindest jî, bi sedemên cure-cure bawer dikin.

Neheqî li dewleta Tirk nekin.

Divê bêjin, ku di hemû welatan da rewş bi vî awayî ye.

Karbidest û rêvabirên hemu welatan bi taybetî jî welatên paşdamayî, kêm an zêde derew dikin û bi gotinên xweş lê pûç û bê naverok, gelê xwe dixapinin.

Lê belê herwekî derewa dawî ya Erdoxan jî nişan dide, derewên karbidestên dewleta Tirk tiştekê din in, cuda ne..

Ji ber vê yekê jî, ne xelet e, ku eger bêjîn “li Tirkiyê siyaset, hunera derew gotinê ye”...

Herwekî jiyan destnişan kiriye, çiqas mezin bin bila bin, emrê derewan kurt in.

Û dibe ku derew kêşa û pirsgirêka civakî, siyasî û aboriyê veşêre, lê belê nikare çareser bike!..