Dema Nû/Amed

Nivîskarê navdar yê Kurd Mehemed Uzun ku ev demeke tedaviya nexweşîna qanserê li nexweşxaneya Karolînskayê ya Swêdê dibîne, ji bo ku berdewamiya jiyana xwe di nav gelê xwe de derbas bike, ji Stocholmê ya paytaxta Swêdê hat Amedê.

Nivîskar, li balafirxaneya Amedê ji aliyê hêjmarek mezin ya gelê Amedê û serokê şaredariya Amedê Osman Baydemîr, serokê şaredariyên din, nûnerên partiyên siyasî, rêxistinên siwîl û rewşenbîrên Kurd ve peşwazî lê hat kirin.

Nivîskar, li ber deriyê balafirxana Amedê, ji aliyê grûbeke mezin ya xelqê Amedê ve peşwazî lê hat kirin û bi tilîlî û sirûdên wek “gelê Kurd bi te serbilind e” rêz û hurmetên xwe ji nivîskar re pêşkêş kirin. Nivîskar, ji seyara ambûlansê pêşwaziya wan ragirt û spasiya xwe pêşkêş kir. Nivîskar di axaftineke xwe ya kurt de diyar kir û weha got; “ ez hatim ba we, hatim ser axa xwe, ji bo jînê, ne ji bo mirinê, ez qûrbana we me". Nivîskar herweha diyar kir ku gelê Kurd, gelekî serbilind e û xwest vê serbilindayiya xwe her biparêze.

Nivîskar, paşê bi seyara ambûlanse ber bi nexweşxanaya taybet ya Venî Vîdî birêket û li vê nexweşxanê derman lê tê kirin. Li nexweşxanê doxtorê nivîskar Mehmet Dursun diyar kir ku nivîskar Mehemed Uzun, ji Swêdê hatiye Amedê û niha li nexweşxaneya wan tedavî dibîne û derman lê tê kirin. Lê divê bê zanîn ku rewşa nivîskar ya tenduristiyê zêde baş nîn e.

Wek tê zanîn, ev demeke nivîskar Mehemed Uzun, li nexweşxaneya Emerîqa û Swêdê ji ber nexweşîna qanserê tedavî didît û derman lê dihat kirin, lê wî biryar da ku wê jiyana xwe ya mayî li Amedê derbas bike. Ji ber vê yekê jî, do li gel malbata xwe û grûbek rewşenbîr pêşî hat Stenbolê û paşê jî hat Amedê.

Qasî hat ragihandin, wê nivîskar heta demekî li nexweşxaneya taybet ya Venî Vîdî ya Amedê, tedavî bibe û derman lê bê kirin.