Navenda Nûçeyan- Şehîdê mezin Dr. Qasimloyê nemir, di 13ê Tîrmehê de bi rê û resmeke hêja û berfireh, bi beşdarbûna tevê endamên rêberî û Kadro û Pêşmerge yên PDK Îranê li binkeya Deftera Siyasî, di 17emîn salvegera şehîbûna xwe de hat bibîranîn.

Rê û resmê, bi xwendina marşa niştîmanî a “Ey Reqîb”ê dest pê kir û piştre kurtefîlmek ku ji aliyê Beşa fîlm ve li ser kesayetiya siyasî ya Dr. Qasimlo û bîr û hizra hin kesayetiyên siyasî û wêjeyî ên Kurd li ser kesayetiya wî rêberê mezin, hatibû amadekirin, pêşkêş beşdaran bû.

Di parek din ya rê resmê de Endamê Deftera Siyasî a PDK Îranê birêz Mistefa Mewlûdî, gotarek li ser raman û kesaytetiya Dr. Qasimlo pêşkêş kir û di gotara xwe de jî, bîranîna birêz Seyîd Selam Ezîzî yê nemir, endamê pêşîn ê Deftera Siyasî a PDK Îranê kiri bû.

Li doma rê û resma han de bi awayê kors du sirûd ji aliyê koma hunerî a PDK Îranê û miqamek ji aliyê birêz Bêhruz Lutfî ve, bi hinceta ji destdayîna rêberê mezin û zana yê Kurd Dr. Qasimlo hatin pêşkêşkirin û her di vê derheqê de jî helbestvananên wek Şerîf Felah, Cemal Necarî û Xatûna Trûske, hestên bi kul û keser yên xwe di çend parçe helbestan de anîn ziman.

Di dawiya rê û resmê de ji aliyê koma hunerî ve bi awayê kors sirûdek hat pêşkêş kirin.

Şehîdê nemir li Cejnekan jî hat bibîranîn

Herweha, li kampa Cejnekan ku nêzî devera Hewlêrê ye, ji alîyê Navenda 3 ya PDK-Îranê ve, ji bo bibîranîna şehîdê nemîr, merasimek hat amadekirin.

Merasimê, bi sirûda Ey Reqîb û deqeyek rêzgirtin ji bo şehîdên Kurdistanê, destpêkir. Pîştî rêzgirtin li şehîdan, endamê Komîteya Navendî ya PDK-Îranê û berpirsê kompa Cejnekanê Mehmed Salih, axaftinek li ser jiyan kar û xebata Qasimloyê nemir kir. Her usa endamê Komîteya Navendî ya PDK-Îranê Ebdullah Qadirîazer û dostê partîyê Dr. Fazil Resûl ku her du jî tevîr.Qasimlo hatibûn terorkirin, bi hestekî mezin ya netewî hatin bi bîranîn.

Li ser navê Yekitîya Jinên Demokratên Kurdistanê Herîr Resûlî û li ser navê Yekitîya Lawanên Demokratên Kurdistanê ya Malbenda 3 Hêmin, axaftin kirin. Şehîd Qasimlo û hemû şehîdên din yên PDKê û Kurdistanê bibîr anîn.

Ji bo bîranîna bîrewer û şoreşgerê nemir Qasimlo û hevalên wî, li ser navê PSK- Hewlêr, Kovan Amedî beşdar bû.

Di civînê de Koma Hunerîya Malbenda 3 ya PDK-Îranê ve gelek sirûd û helbestên şoreşgerî û netewî hatin xwendin.

Xelqê Mehabadê Dr. Qasimlo bi bîr anî

Li Rojhilatê Kurdistanê xelqên bajarê Mehabadê, bi xwepêşandar û çalekiyên cur becur Şehîdê mezin Dr. Qasimloyê nemir, di 17emîn salvegara şehîdbûna wî de, bibîranî. Xelkê mehabadê û yên derdorê, li meydana Şoreş lihev kom bûn û bi helkirina agir li ser şeqaman bi dijî rejîmê xwenîşandanan pêk anîn.

Li gor ku ji aliyê hin ajansên nûçeyan ve hatiye belavkirin, xelqê bajarê Mehabadê jî, Dr. Qasimloyê nemir, di 17emîn salvegera şehîdbûna wî de, bi çalekiyên cur becur wî bibîranî. Mehabadiyan, di 13ê Tîrmehê de ji bo şermezarkirina şehîdkirina Qasimloyê nemîr, kilît li deryên dikan û karxaneyên xwe xistin û daneketin bazaran û herweha li meydana Şoreş bi xwepêşandarên cur becur, Qasimloyê nemîr bibîr anîn.

Li gor ku hatiye ragihandin, li suk û bazarên Mehabadê xeyn ji hêzên ewlekarî yên resmî û sivîl yên İranê, tu kesek tunebûn. Tevê esnaf û karmendên Mehabadê, ji ber 17emîn salvegera Şehîdbûna Qasimloyê nemîr, dikan û karxaneyên xwe venekirin û dest bi kar nekirin. Mehabadiyan, li hin taxên bajêr bi xwepêşandar û çalekiyên cur becur, rejima hov şermezar kirin û Qasimloyê namir, bibîr anîn.