Bi gor nuçêyên, ku di medyayên Kurdî, bi taybetî medyayên Kurdistana Başûr da cî girtine, di bin Fermandeyiya Giştî da, Hêzên Çakdarên Parastina Kurdistanê hatiye damezrandinê.

Bi gor Destura Herêma Kurdistanê, Serokê Herêma Kurdistanê Mesud Barzanî, Serokê Fermandariya Giştî ye.

Kosret Resul Alî jî cîgîrê Serokfermandar e.

Herdu wezîrên pêşmerge yên berê yên hikumeta Suleymanî û Hewlêr û fermande û pisporên din yên serbazî jî wekî endam di Fermandariya Giştî da cî girtine.

Ne tenê pêşmergeyên Yekitî Niştimanî Kurdistan û Partî Demokratê Kurdistan, her usa pêşmergeyên hemu hêz û partiyên Kurdistanê di bin Fermandariya Giştî da ci digrin.

Bi gor nuçeyên, navê “Pêşmerge” herwekî xwe dimîne.

Lê erkê wî hatiye guhartin.

Û erkê Hêzên Çekdarên Parastina Kurdistanê, berevanî kirina xaka herêm e.

Bê guman yêkxistina hêzên Pêşmergeyên Kurdistanê di bin fermandeyiyek da, mizgîniyeka xweş e, gavekê gelek giring e.

Heyamek berê niha jî, herdu wezaretên dadî yek bûn.

Pêvajoya yêkxistina herdu Wezaretê Navxweyî jî berdewam e.

Bilî ji wezaretan, gelek sazî û dezgehên fermî û civakî û pîşeyî jî dibine yek.

Ligel hinek kêmasî û xalên lawaz, yekxistina sazî û dezgehên îdarî û civakî, dilê gelê Kurd li seranserê Kurdistanê xweş kir, dike.

Guman têda nîne, ku dilê neyar û nehazên ezmuna Kurdistana Başûr bi yekxistina wezarat û sazî û dezgehan, reş dibe..

Meriv eger ziruf û hal û mercên navçê, Iraq û Kurdistanê li pêş çav bigre, giringiya yekxistina hêzên Pêşmerge pirtir derdikeve holê.

Erebên Sunî û nijadperest, her roj êriş dikine ser Ezmuna Kurdistanê.

Erebên Şîa bi bahane û rêkên cuda cuda, dixwazin pêşiya ci be ci kirina xala 140 a Destura Iraqê bigrin.

Dewleta Tirk jî her roj, li ser pirsa Kerkuk û bi bahaneya hebûna bingehên PKKê li ser sinoran, gefa Kurdistana Başûr dixwe.

Bi baweriya min hel û mercên navçeyî û Iraqê bona êrişa Tirkiyê li ser Kurdistana Başûr musaîd nîne.

Lê belê, paş êriş û gefxwarina dewleta Tirk, zêdebûna çalakiyên terorîstên di Kerkuk û derdorê Kerkukê da, li ba gelê Kurd nigeraniyek pêkaniye.

Yekxistina hêzên Pêşmerge nîgeraniya hanê jî, ji ortê rakir.

Yekxistina hêzên Pêşmerge, ne tenê di warê asayiş û parastinê da, girîng e.

Bi baweriya min dibe destpêkek ji bona bêçekkirina siyaset, bi taybetî jî bêçekkirina partiyên siyasî li Kurdistana Başûr.

Bi gotineka din, xebata siyasî vedigere mecra û kanalên xwe ya siruştî.

Bi vî awayî li Başûr gaveke dinê ber bi avakirina civata hevdem tê avêtin.

Ku, ewên hanê jî girîngiya yekxistina hêzên Pêşmerge pirtir dike.

Guman têda nîn e, di hemu waran da yêkxistina herdu îdare daxwaza hemu Kurdan e.

Dil dixwaze herçî zûtir yekxistina herdu hikumet temam be.

Lê belê divê bizanin, ku herdu îdare berhema nakokiyek e, ku bêtirî çil sal berê destpêkiriye.

Divê ji bîra me neçe, ku nezîkê 10 sal du hikumet di navça xwe da desthilatdar bûn.

Gelek biryarên cuda cuda ji aliyê herdu hikumetan va hatine girtin û cîbecîkirinê.

Bi kurtî yekxistina herdu îdare hêsan nîn e.

Lê belê ciyê kêfxweşiyê ev e, ku Serokatiya Siyasî ya Kurdistanê li ser yekxistina herdu îdare di hemû waran da, pêgir e.

Ku yekxistina hêzên Pêşmerge nîşana vê yekê ne.

Û ev pêgirî jî, dilê hemû Kurdan xweş û yên nehez û neyaran jî reş dike.