Li gor nuçeyan, Serdozgerê (mudeyî umumî, savci) Amadê, dosyayê Serokê Şardariya Amedê Osman Baydemir temam kiriye. Di rojên pêş me da, Osman Baydemir wê derkeve li ber dadigehê.

Her usa li gor nûçeyan, serdozger daxwaz dike, ku Baydemir 10 sal bê zindankirin.

Wek tê zanîn, çend meh berê, di heyama Bûyerên Diyarbekirê da, Osman Baydemir gelek hewl dabû, ku rewşa bajêr aram be, şer û pevçûn nemîne. Hingê jî hinek nivîskar û rojnamevan nivisî bûn, ku “Baydemir pesna PKKê û çalakiyên terorîstî daye” û hwd...

Û dîsa tê bîra me, ku du muraqibên (mifetiş) Wezereta Navxweyî ya Tirkiyê, derbareyê hewl û gotina Osman Baydemir de, di dema bûyerên Diyarbekîrê da, lêkolin çêkiribûn.

Her wekî eşkere ye, Serdozgerê Amedê, dosyayê Osman Baydemir, li ser rapora muraqibên Wezareta Naxweyî amade kiriye.

Bi gotineka din, bi destûra wezerata navxweyî, ango bi destura Hikumeta Tirkiyê dosyaya Serokê Şardariya Diyarbekirê hatiyê amadekirin.

Ev yêka carekê din jî nişan dide, ku dewleta Tirkiyê nexwaze tevgera netewiya Kurd li Kurdistana Bakur, di kanalên eşkere, demokratîk û aşitîxwaziyê da biçite pêş.

Tê zanin, dewleta Tirk, heta îro bersiva daxwazên netewî û demokratîkên Kurd, tenê bi zilm û zordarî daye, her usa pêşiya xebata siyasî yê eşkere û aşitixwaz, kar û çalakiyên çandî û rewşenbîriyê girtiye. Daxistina komelan û partiyên siyasî weku HEP, DEP, DDP û hwd. nişana vê yekê ne.

Dewleta Tirk, bona ku serokên şardariyên Kurd, yên ku endamê partiyên Kurd in, di kar û barên xwe da serkevtî nebin, gelek astengên îdarî û malî derdixe pêşiya wan, hencet digere, ku wan ji serokatiyê dûr bêxe, bide dadigehê û bike zindanê.

Proseya Osman Baydemir jî, berdewamiya siyaseta hanê ya dewleta dagirker e.

Li Tirkiyê, rojname û televîzyonên Tirk derbareya dizî û bertilxwarinê de, di gelek şardariyan da, nûçe belav kirin û dikin. Serokên şardariyên, ku derheqa wan da nûçeyên hanê hatine belavkirinê, li ser kar û postê xwe ne. Lê belê serokên şardariyên Kurd, ji ber ku behsa maf û azadiyên Kurdan kirine, nexwastine, ku ROJ TV were girtin û piştgiriya ROJ TV kirine, têne dadigehkirin.

Divê ji bîr nekin, ku dewleta Tirk her tim xwastiye û dixwaze berê Kurdan bide çiya. Ji bona vê yekê jî, pêşiya bizava siyasiya legal, xebata çand û roşenbîriyê girtiye û digre. Girtin û dadigehkirina serokên şardariyên Kurd jî, ji bona vê armancê qirêj e.

Bona pûçkirina sîyaseta hanê ya dewleta dagirker, pêwist e bizava azadiya Kurdistan, li ber astengên dewletê li berxwe bide, li ser rêya legalî, xebata çandî û roşenbîriyê pêgir be.

Divê ji bîra me neçe, ku parastina şardariyên Kurd û xweyî derketin li wan, him erkekê netewî û giring e û him jî rêz girtin e li îrade û dengê gel.

Ji bona vê yekê îdeolojî, bîr û baweriya Osman Baydemir çi dibe bila be, ew endamê kîjan parti dibe bila be, divê hemu rexistinên siyasî li hemberê êrişa dewleta dagirker, piştgiriya Osman Baydemir û sorekên şardariyên dîn bikin û bona vê armancê destê xwe bidine hevudu.