Wezirê Kar û Barê Derva yê Tirkiyê Abdulah Gul, di wan rojên dawiyê da, careke din buxtan li serokên Kurdistana Başûr kir û gefa li gelê me yê vê beşê xwar.

Abdullah Gul, dibêje, ku “bila Barzanî û Talabanî pişta xwe bi Dewleta Yekbûyî ya Amerîka (DYA) girênedin; dewleta Kurd xewn e, bila xewnê usa nebînin, yekitiya Iraqê biparêzin û bila xwe nezikê Kerkukê nekin, DYA îro li navçe ye, sibê wê here, em xwe bi xwe bimînin” û hwd..

Fermayiş û desturên Abdula Gul jî, wekî hevpişeyên xwe yên berê ne.

Bi gotineka din, Abdullah Gul siyaseta resmî ya dewleta Tirk, ya derheqê pirsa Kurd dubare kiriye.

Abdulah Gul derheqê DYA hişyarî dide serokên Kurdistana Başûr.

Lê belê, ji bîra Gul çûye, ku Tirkiye di hemêza DYA da mezin bûye; îro jî bona ku pêyvendiyên xwe ligel DYA baş bike, gelek hewl dide.

Abdulla Gul ji bîr kiriye, ku DYA her tim di warên sîyasî, askerî û aboriyê da, alîkar û piştgirê dewleta dagirkerê Tirk bûye, qasê berê nebe jî, îro jî usa ye..

Abdula Gul jî dizane, ku pêyvendiya Kurdên Başûr ligel DYA, bi şerê Kendavê ve destpê nekiriye.

Û Abdula Gul divê bizane, ji bîra Kurdan neçûye, ku DYA bo Kurdan du caran bûye hevalê nîverê; carekê di sala 1975’an da, carekî din jî di sala 1991’an da.

Digel vê yekê, divê Abdula Gul bizane, Serokatiya Kurdistana Başûr dizane, ku berjewendiya Kurd û DYA û dewletên Rojava li navçe, eger yek nebe jî, gelek nêzikê hev in.

Û serokên Kurdên Başûr nexwazin firsendê hanê ya dîrokî ji dest bidin.

Ji bona vê yekê jî giringiyeka taybet didine pêyvendiya xwe ya ligel DYA û dewletên Rojavayê. Dixwazin pêyvendiyên xwe ligel dewletên hanê xurttir û baştir bikin; wekî Tirkiyê!..

Divê Abdula Gul bersiv bide, gelo tiştek, ku ji bo Tirkiyê helal û reva ye, çima ji bona Kurdistana Başûr heram û nereva ye?

Ma bîlî ji dijminahiya azadiya Kurd û Kurdistanê, bersiveka dinê ya Gul heye?

Tiştekê veşartî nîne, ne tenê Abdula Gul, hemu karbidestên dewletên dagirkerên Kurdistanê, hertim gefa li Kurdan xwarine, dixwin.

Ew dixwazin bi gef xwarinê ve me bitirsînin, ji kar û xebata azadiyê dûr bêxin.

Lê belê bûyer û rûdavên Kurdistanê, qonaxa, ku xebata azadiya Kurdistanê têda ye û deskevtiyên Başûr nişan didin, ku gef xwarina dagirkeran badilhewa û bê sud bûye.

Kurdan guhê xwe nedane û nadin gef û gurên dagirkeran.

Bona vê yekê jî, baştir e Abdula Gul û kesên wek wî, dev ji buxtan kirin û gef xwarinê berdin.

Rêza îrade û xwestekên Kurdên Bakur û gelên Iraqê bigrin.

Astengan li ber cî be cî kirina Destura Iraqê dernexin. Bi taybetî cî be cî kirina xala 140’ê ya Destura Iraqê, ku derheqê Kerkuk û navçeyên din de ne, ku bûne armanca sîyaseta erebkirinê.

Serokatiya Siyasiya Kurdistana Başûr gelek caran eşkere kiriye, ku dixwaze ligel dewletên cîran li ser bingeha wekhevî bijîn.

Bona vê armancê jî destê xwe dirêjî ciranên xwe kirine.

Baştir e, ku dewleta Tirk destê dostaniyê, ku Hikumeta Herêma Kurdistanê dirêj kiriye, bigre, tenişta pêyvendiyên aboriyê, pêyvendiyên sîyasî û civakî jî bigre.

Ev yeka ji gef xwarinê çêtir e, ne tenê xizmetek e bona aramiya navçe, her usa berjewendiya dewleta Tirk jî di pêyvendiyên baş da ye..