Li ser axaftina Serokkomarê berê yê Tirkiyê Kenan Evren, di vê welatî da tofanek rabû.

Her wekî tê zanîn Kenan Evren, pirtir wekî generaleke kudutaçî tê nasînê.

Wî û hinek generalên Tirk, di 12’ê İlona sala 1980’an da kudutayê eskerî çêkirin.

Kenan Evren û havalên wî, Destura Tirkiyê binpê kirin, deriyê Parlamentoyê daxistin.

Maf û azadiyên siyasî û ferdî, ji holê rakirin.

Di serdema desthilatiya wan da hemu partiyên siyasî çi çep, çi rast û çi sosyaldemokrat, hemu sendîkayên karkeran, sazî û dezgeyên pîşeyî û sivîl hatin girtin, kar û xebata wan qedexe bû.

Di serdema Evrenê diktator û xwînrij da, Tirkiyê bi taybetî Kurdistana Bakur ji bona gel û hêzên welatparêz û demokrat bûbû dozexek.

Di dema 12’ê Îlona faşîst da, nezîkê 2 mîlyon kes wekî gumanbar hatine tomar kirinê.

230 hezar kes hatine dadigehkirin û ji bona 7 hezar kes hukmê sêdarê hatine xwastin, ku ji bona 517 kes ji wan hukmê îdamê derketiye.

Ku hukmê îdamê ya 50 kesan hatine cî becîkirinê.

30 hezar kes bi tawanê “gumanbar” ji karên xwe hatine durxistin.

Rejîma Kenan Evren, mafê hevwelatî yên 14 hezar kes ji destê wan girt.

30 hezar kes ji ber zilmu û zordariya rejîma eskerî derketine dervayê Tirkiyê.

171 kes di bin îşkenceyê da mirin.

Diktatoriya faşîst 3 hezar û 854 mamosta û 120 profesor ji dibistan û zaningehan derxistin.

Çalakiya 23 hezar û 677 komel û saziyên sîvîl hatine qedexe kirinê.

Ji bona 400 rojnamevan cezayê 3 hezar û 315 salê zîndanê hatine dayîn, 300 rojnamevan ketin ber êrîşê û 3 rojnamevan hatin kuştin.

Rejima diktator û zordar ya Evren, 39 ton rojname û kovar şewitand.

Di zindanan da 299 kes ji ber zirufên ne mirovî mirin, û hwd.

Hewce nîn e ku kiryarên dij-însanî ya rejima 12’ê Îlonê ya faşîst dîrêj bikin.

Lê belê dîvê bê gotin, ku zilm û zordariya rejima Kenan Evren li Kurdistana Bakur, bi taybetî di zindana Diyarbekîrê de bê hempa bûn.

Di serdema Evren da qedexekirina zîmanê Kurdî bûye xaleka Destura Tirkiyê.

Di gundên Kurdên Alevî da, ku nimêj nakin, mizgevt hatine çêkirinê.

Kenan Evren digot, “Kurd nîne. Tirkên çiya hene, ku wexta li ser befrê û çiyayê dimeşîn, dengê “kart û kurt” derdixin û lewma ew ji xwe ra dibêjin Kurd.”

Gava Evren van karên dij-mirovî encam dida, gelên Tirk û Tirk di bin deshilatiya wî û hevalên wî da dinaliyan, dengê kes û hêzên kevneperest û nijadperestên Tirk dernediketin; ew alikariya wan dikirin.

Hezên hanê îro jî sîstem û Destura Tirkiyê diparêzin, ku berhema serdema Evren e.

Lê belê hezên mîlîtarîst, kevneperest û hinek çepên Tirk îro bi hevra êrîşê Kenan Evren dikin.

Serî li dadigehê didin, daku Evren li ser gotina xwe bê dadigeh kirinê.

Baş e Kenan Evren çi gotibû, ku dost û hevsengerên wî yên qedîm dîn û har bûne?

Kenan Evren dibêje, di hilbijartinê da rîjeyê sedî da 10 gelek bilind e, divê bê daxistin; Kurdan birayên me ne, eger mafê wan bidin ew tev me dimînin;

Li Başûrê Kurdistanê dewleteka Kurdî ava bûye, dîvê vê rastiyê qebul bikin;

Em nikarin herin Kerkukê dagir bikin;

Êdî Tirkiyê bi sîstema navendeka bi hêz va nayê îdare kirinê, divê sîstemê eyaletî were damezrandinê, deshilatiya îdarî ya herêmî bê zêde kirinê..

Herwekî eşkere ye, gotinên hanê maqul in û Kenan Evren ji ber van gotinan dikeve ber êrîşa mîlîtarîst û nijadperest û hinek çepên Tirk.

Gava mudeyî umumi (sawci) Sacit Kayasu xwast, ku Kenan Evren ji ber ku kuduta çêkiriye, Parlamentoya Tirkiyê daxistiyê, Destura Tirkiyê binpê kiriye, bê dadigeh kirine, him hikumeta vê demê û him jî hezên hanê êrîşê ser sawciyê hanê kirin.

Sacit Karasu perişan û derbeder bû.

Lê îro gelek sawcî dixwazin ji ber gotinên jorî, Kenan Evren bê dadigehkirinê.

Bê guman eger gotina Kenan Evren dij-Kurdan û dijî Hikumeta Herêma Kurdistan bana, wê kevneperest û mîlîtaristên Tirk pesnê hevsegerên xwe bidana, sawciyên Tirk jî bê deng bimana.

Lê belê ji ber ku Evren derheqa Kurdan da tiştên maqul dibêje, bi hemû hêzên xwe êrîşê ser wî dikin.

Ya herî balkêştir ev e, ku ligel hinek çep, mîlîtarîst û nosyonalîstên Tirk dibêjin, ku Kenan Evren nokerê Dewleta Yekbûyî ya Amerîka (DYA) ye, bi daxwaza DYA kuduta çêkir îro jî dîsa bi daxwaza DYA gotinên hanê dike..

Rast e, ku Evren û hevalên wî nokerê DYA bûn û kudutayê jî bi daxwaz û piştgiriya DYA çêkirin.

Lê, rastiya hanê maqul bûn û giringiya axaftina Evren kêm nake.

Her usa axaftina dawî ya Evren, destê Evren paqij jî nake.

Ku, destên wî û hevalên wî bi xwîna gelê Kurd û Tirk sor in.

Em Kurd, kar û kiryara Kenan Evrenê diktator û faşîst jibîr nakin.

Lê divê durutiya “dostên” me jî, ji bîra me neçitin!.

Ku ji me dixwazin dijî axaftina Kenan Evren derkevin, ji ber ku ev nokerê DYA û bi dustura DYA gotinên hanê dike.

Ki û kijan dewlet dibêjin bila bêjin, ji bo me giring ev e, ku gotinên hanê rast in an na?

Li zirufên Tirkiyê û daxwazên Kurdan hev tên an na?

“Dost”ên me, şûna, ku li ser xirabiya Evren û DYA bo me çirokên guran bêjin, hewl bidin, ku ji me fêhm bikin û rewşa me têbigihin.

Halwesta hanê xizmeta berjewendiya gelê kurd û Tirk dike.

Ne çîrok gotin li ser xirabiya Evren û DYA..