Eger dewleta dagirker qedexe neke, di roja 5’ê meha Tîrmehê sala 2006’an da, welatparêzên Kurd ji bo bîranîna serokê Partiya Demokrata Kurdistana Tirkiyê (PDK-T) Faik Bucak, li ser qabrê wî bêne ba hev û vefadariya xwe li şehîdên xwe nîşan bidin.

Ez piştrast im, li derwayê Kurdıstana Bakûrê gelek kes hene, ku bi dil û can dixwazin di vê merasîma girîng da beşdar bin. Lê belê ji ber sedemên eşkere û diyar nikarin. Lê dîsa ez piştrast im ku dilê wan, bîr û hizrê wan, di roja merasimê da, wê ligel beşdarên merasimê bibe..

Ez yek jî ji wan kesan im...

Herweku tê zanîn, 40 sal berê niha, Serokê PDK-K Faik Bucak hatibû kuştin. Eger ez şaş nebim, evê cara yêka ye, ku Faik Bucak li ser qebrê xwe, bi beşdarbûna gelek welatparêzan û bi bernameka rêk û pêk, tê bîr anînê. Ev yêka jî nişan dide, ku dewleta dagirker û nijadperestên Tirk çi dikin bila bikin, çiqas zordar dibin bila bin, çiqas xwîna Kurd dirijinin bila birijinin, nikarin derheqa şehîdan, hestê vefadariyê ji dilê me derxin.

Rast e, ji ber gelek sedeman, ji ber zilm û zordariya degirkeran, Kurd carna nikariye, an neveriye yadê rêber, serok û pêşengên xwe yên şehîd, li ser qebra wan bike. Lê, Kurd tu caran şehidên xwe ji bîr nekiriye, nake. Berdewamiya xebata û rêbaza wan, nîşana vê rastiyê ye.

Bê guman nav û nasnameya kesên, ku pilepîtkeyê (tetîk) kişandiye, çi dibe, bila be, di pişt perdeya kuştina Faik Bucak de dewlet heye. Qetilê şehîde nemir sîstema dagirkerî ye, siyaseta zilm û zordarî ye.

Dîrokê me, nişanê me dide, ku dijmin û nehezên azadiya Kurdistanê, hertim xwastine, ku gelê Kurd bê rêxistinên siyasî û civakî û çandî be. Ronakbîr û zanayên Kurd ji tevgera netewî dûr bin. Bona wan armancên kîrêt, çi ji destê wan tê, dikin. Serok û kadroyên bijartî yên rêxistinan dikujin, gefa li ronakbîran dixwin û hwd..

Guman têda nîne, ku kuştina helbestvan û ronakbîrê hêja, serokê PDK-T Faik Bucak her ji ber sedêmên jorî bû.

Li Bakurê Kurdistanê, Faik Bucak serokê şehîd a yêka nîn e. Xalid Bege Cîbrî, Şêx Saîdê Pîran û hevalên wî, Sêy Rizayê Dêrsimî û yarenên wî, Alîşêr û jina wî Zarife Xatun beşek in ji serok û rêberên Kurd, yên ku ji aliyê dewletê kurdkujê va hatine kuştin û bi darda kirinê. Û her usa em dizanin, ku gora hinek serokên me yên şehîd diyar nîn e. Kes nizane qebrên wan li ku ne?

Merasîma, ku ji bona bîranîna Faik Bucak hatiye amade kirinê, destpêkekê gelek giring û baş e, ji bona bîranîna rêberên şehîd yên dinê.

Bi baweriya min, bîranina serokên şehîd, erkeke girîng a tevgera netewiya Kurd li Kurdistana Bakurê ye. Bizava azadiya Kurdistanê bona vê armanca pîroz, divê ligel malbata şehîdan bi gor zirufên heyî bername amade û ci be cî bike.

Kar û çalakiyên hanê yên hevbeş, ne tenê vefadariya me nîşan dide, hestên netewî bilind dike, her usa dibe bingeheka qehîm ji bona hevkarî û hevbendiya hezên welatparêz.

Ez carekî din li ber bîranîna Faik Bucak û hemû şehîdên Kurdistanê qirnoş dibim.

Rûhê wan şad, rê û rêbazê wan berdewam be.

(* ) Faik Bucak e an Fayiq Bucax? Gelo ji aliyê rêziman û rastnivisê kîjan rast e? Ez nizanim. Ev yêka karê zana û pisporên zimanê Kurdî ne. Divê ew biryar bidin, bêjeyên ku ji derve tê û tekîlê zimanê me dibe, wê çawa bên nivîsîn? Wekî xwe bê nivîsîn an çawa tê xwendinê usa bê nivîsîn?